Min? Jien?

X’se nagħmlu dwar in-nuqqas ta’ Vokazzjonijiet?

Ħafna minna jafu, u jħobbu jgħidu, t-talba għall-vokazzjonijiet... "Mulej, Missier ta' Sidna Ġesù Kristu, li qal li l-ħsad huwa kbir imma l-ħaddiema huma ftit, nitolbuk li tibgħat aktar ħaddiema għall-ħsad tiegħek..."

Aktar minn qatt qabel, illum huwa ferm importanti li t-tfal u ż-żgħażagħ tagħna jsibu min jiggwidahom waqt li jkunu qed jaħsbu dwar il-futur tagħhom.  Li "tiggwida" hi eżatt bil-maqlub ta’ li "ġġiegħel"...  Hija ħidma li titlob delikatezza w imħabba kbira lejn l-individwu għax trid tagħti l-libertà kollha waqt li tipprova tgħin biex issir deċiżjoni tajba.

Jiena nemmen li s-sejħat tiegħu Alla jagħmilhom fiċ-ċokon, biex il-bniedem –huwa u jimmatura – jkompli jibni ħajtu madwar is-sejħa li tkun saritlu.  Dan mhux proċess faċli, għal ħadd.  U xejn inqas għaż-żgħażagħ li llum huma mdawrin b'tant opportunitajiet li faċilment inessuk il-veru skop tal-ħajja.

"Agħmel li ż-żgħażagħ tagħna jkunu dejjem aktar ġenerużi għas-sejħa tiegħek..."  Trid preparazzjoni biex tinduna Alla xi jkun qed jitlob minnek. Waqt li nikbru bħala nsara u ngħixu ħajja li togħġob lil Alla fl-affarijiet iż-żgħar ta' kuljum, inkunu qed niftħu ħajjitna għal Kristu, u fina tinbet xewqa li nwettqu r-rieda tiegħu – tkun xi tkun – anke jekk tkun sejħa li taħsadna jew li ma nistennewhiex!

Is-saċerdot fil-parroċċa għandu biċċa xogħol sabiħa ħafna, l-ewwelnett għax għandu ċans jgħix fost in-nies li hu jqishom bħal aħwa tiegħu. Flimkien iridu jiskopru d-doni li Alla jkun qed jafdalhom – bħala individwi u bħala komunità.  Is-saċerdot, u kull nisrani, għandhom ikunu grati lejn Alla u lejn xulxin għax permezz tal-ħajja flimkien Hu jkun qed iħeġġina "għal doni akbar".

Il-kuntatt man-nies fil-parroċċa iqiegħed lis-saċerdot fil-qalba tal-ħajja.  Tagħtih dawl fuq dak li qed jiġri fis-soċjetà, fil-familji; fuq dak li qed jgħin jew itellef lill-bniedem waqt li jkun qed jgħix ħajtu.  Issa hu l-waqt biex "noħorġu mill-bieb tal-Knisja" kif sar iħobb jgħid il-Papa Franġisku, u nibdew nagħmlu xi ħaġa ta' ġid fid-dinja ta' madwarna.

Int ukoll li qed taqra tista’ tagħmel xi ħaġa.  Ibda għid kuljum it-talba għall-vokazzjonijiet.  Sib mument meta tista’ tgħidha ma’ xi membri tal-familja.  Jew inkella agħżel ġurnata fix-xahar u għamluha l-ġurnata tagħkom tal-familja biex titolbu għal dan il-għan.  Jekk ikun hemm iktar nies fil-parroċċa li jitħajru bħalkom, tkun inħolqot talba kontinwa lil Alla matul ix-xahar kollu.

Jalla jkollna għal qalbna l-vokazzjonijiet anke mill-parroċċa tagħna.  Waqt li napprezzaw ix-xogħol li jwettqu fostna s-saċerdoti tagħna, ejjew nitolbu u nagħmlu ħilitna biex fina u madwarna tkompli tinbena s-Saltna t'Alla.